Молитва ко Господу Богу, читаемая во время брани против супостатов, находящих на ны.

Господи Боже сил, Боже спасения нашего, Боже творяй чудеса Един, призри в милости и щедротах на смиренная рабы Твоя, и человеколюбно услыши и помилуй нас, ныне молящихся за братий наших: се бо врази наши собрашася на них и на ны, во еже погубити нас и разорити святыни наша. Ты же, вся ведый, веси, яко неправедно восташа на ны, и яко не возможем мы противостати множеству их, аще не Ты явиши помощь нам. Темже грешнии и недостойнии в покаянии со слезами молимся Ти: помози братиям нашим и всем православным христианом, Боже Спасителю наш, и избави нас славы ради имени Твоего, да не когда рекут врази наши: Бог, оставил есть их, и несть избавляяй и спасаяй их, но да уведят вси языцы, яко Ты Бог наш и мы людие Твои, под державою Твоею всегда хранимии. Яви нам, Господи, милость Твою и да приложатся к нам словеса: дерзайте, стойте и узрите спасение от Господа, Господь бо поборет по нас. Сотвори с нами знамение во благо, яко да видят ненавидящие нас и православную веру нашу, и посрамятся, и смирятся. Ей, Господи, Боже Спасителю наш, Крепосте и Упование и Заступление наше, не помяни беззаконий и неправд людей Твоих, и не отвратися от нас гневом Своим, но в милости и щедротах Твоих посети смиренная рабы Твоя, ко Твоему благоутробию припадающия; возвесели сердца братий наших и всех православных христиан о милости Твоей и укрепи их силою Твоею; восстани в помощь нашу и разруши лукавые советы мыслящих нам злая; суди обидящия и побори борющия ны, и обрати нечестивое дерзновение их в страх и бегство; братиям же нашим и православному воинству, на Тя уповающему, подаждь во мнозем дерзновении и мужестве погнати и постигнути их, и о имени Твоем победити; а имже судил еси, положити на брани души своя за православныя Веру и Отечество, тем прости согрешения их и в день праведного воздания Твоего воздай венцы нетления.

Ты бо еси заступление, и победа, и спасение уповающим на Тя, и Тебе славу возсылаем, Отцу и Сыну и Святому Духу, ныне и присно, и во веки веков. Аминь.

==================================

Живый в помощи Вышняго, в крове Бога Небеснаго водворится. Речет Господеви: Заступник мой еси и Прибежище мое, Бог мой, и уповаю на Него. Яко Той избавит тя от сети ловчи, и от словесе мятежна, плещма Своима осенит тя, и под криле Его надеешися: оружием обыдет тя истина Его. Не убоишися от страха нощнаго, от стрелы летяшия во дни, от вещи во тме преходящия, от сряща, и беса полуденнаго. Падет от страны твоея тысяща, и тма одесную тебе, к тебе же не приближится, обаче очима твоима смотриши, и воздаяние грешников узриши. Яко Ты, Господи, упование мое, Вышняго положил еси прибежище твое. Не приидет к тебе зло, и рана не приближится телеси твоему, яко Ангелом Своим заповесть о тебе, сохранити тя во всех путех твоих. На руках возмут тя, да не когда преткнеши о камень ногу твою, на аспида и василиска наступиши, и попереши льва и змия. Яко на Мя упова, и избавлю и: покрыю и, яко позна имя Мое. Воззовет ко Мне, и услышу его: с ним есмь в скорби; изму его, и прославлю его, долготою дней исполню его, и явлю ему спасение Мое.